Mama Put, Zion Kitchen Don Get First Class Upgrade - USA
Na better-better we go dei see as 2017 come dei blow joly-joly for Zion Kitchen wei be our original mama put for Washington D.C. here for USA. The kitchen wei e-belong to Madam Oyindamola Akinkugbe, don dei manage one small store space for almost 15 years until papa God come shower her blessings with this oyinbo style first class restaurant with a lot of space. Like we say from our correct oyimbo report, we believe say prophet T.B Joshua, miss the download for him vision, wei he nor come fit forecast this surprise wei madam Akinkugbe take shine. The new design restaurant wei the madam call "ZK Loung & Grill" open officially for Saturday December 24th 2016. As our tori oga, Jolly Egbon find out, him say the madam tell am say the delivery system too don advance go digital as "Uber delivery system" and "Chop 2 Go delivery system" don dei wait for customers to begin make their belle order after the new year celebration. The madam also add say, this camkpe restaurant dei provide in-house chopping and take comot of all kind of wackis. Madam Akinkugbe also talk say, you fit rent the restaurant for small party like, marriage, birthday, dance and other small gathering wei nor go broke her glass. The new restaurant don come with private area wei you and your chikito fit cooleh, and with wine bar wei e full of assorted oyinbo ogogoro. For most of the evening, the restaurant dei offer light band music plus in house DJ for make you forget your sorrow. The time for open na from 10 O'clock for morning until 2 for night time. Madam Akinkugbe say make you nor forget say, this restaurant dei handle any large party wei you want make dem cook bring am for you. This new style restaurant come with credit card for payment of chopers wei e-nor want to wash plate. The menu wei this restaurant dei offer full of assorted swallow like eba, fufu, amala, iyan, oyinbo fufu and so on. As for papa Emeka, well prepared isi-ewu, and Asun dei ready for him consummation, as bitter leaf soup, cassava leaf, gbegiri, ewedu, efo riro and hot ogbono soup dei wait for una, 'the madam conclude." Visitors wei dey visit USA nor need to goggle for bread and flat meat any more as a single phone call from their hotel go place the food for their door mouth.
Source: Jolly Egbon